Vinicius Junior është shpallur fitues i çmimit FIFA ‘The Best’ 2024 në një ceremoni e cila u mbajt sot (e martë) në Doha të Katarit.
Ky triumf ka bërë që Vinicius t’i bashkohet një liste ekskluzive të legjendave braziliane të cilët kanë marrë çmime nga FIFA që nga krijimi i saj në 1991.
Ai do të ndjekë hapat e legjendave si Romario, Ronaldo Nazario (tre herë fitues), Rivaldo, Ronaldinho Gaucho (dy herë fitues) dhe Kaka.
Vinicius po ashtu është bërë lojtari i parë brazilian që e fiton çmimin si futbollisti më i mirë në botë që nga viti 2007.
Si fitues i Ligës së Kampionëve dhe La Ligas me Real Madridin, Vinicius ishte njëri prej lojtarëve kryesor të gjigantit spanjoll gjatë sezonit 2023/2024.
Ai u paraqit në 39 ndeshje në të gjitha garat, duke kontribuar me 24 gola të shënuar dhe 11 asistime.
Vinicius dhe ekipi i tij Real Madridi është momentalisht në Katar, atje ku nesër (e mërkurë) do të luajnë ndaj Pachucas në kuadër të finales së Intercontinental Cup.
Fituesi i këtij çmimi u shpall në bazë të votave si në vijim:
25 për qind të votave nga kapitenët e kombëtareve
25 për qind të votave nga gazetarët
25 për qind të votave nga përzgjedhësit e kombëtareve
25 për qind të votave nga tifozët
