Një fenomen mjaft shqetësues për qytetarët e Kosovës janë bërë vjedhjet e shpeshta nëpër banesa e shtëpi, duke shkaktuar humbje e pasiguri. Të tilla raste kanë ndodhur dhe nëpër vendbanimet e zyrtarëve të shtetit. Mbrëmë, cak i hajnave ishte edhe shtëpia e një polici në Gjakovë, raporton Gazeta Sinjali.
Burimet e Sinjalit bëjnë me dije se këtë herë hajnat ia kanë mësyrë shtëpisë së një zyrtari policor (emër i njohur për redaksinë), në fshatin Cermjan, ku dyshohet se depërtuan me forcë dhe vodhën gjësende me vlerë.
Vjedhja u krye dyshohet se u krye në orët e mbrëmjes, periudhë kjo që u shfrytëzua nga hajnat, të cilët dyshohet se arritën të vjedhin armën zyrtare të policit, stoli ari, si dhe para të gatshme.
Pasi rasti u denoncua në Polici, njësitë përkatëse kanë dalë në vendin e ngjarjes, ku janë kryer ekzaminimet e nevojshme.
Me urdhër të Prokurorit të Shtetit, rasti është iniciuar për veprën penale “Vjedhje e rëndë” dhe kanë nisur hetimet për identifikimin dhe kapjen e personave të dyshuar.
