Një ekip ekspertësh të pavarur të cilët këshillojnë Qendrat për Kontrollin dhe Parandalimin e Sëmundjeve (CDC) votuan në një takim publik të martën që punonjësit e kujdesit shëndetësor dhe banorët e institucioneve të kujdesit afatgjatë të jenë të parët që do të marrin vaksinën e shumëpritur të koronavirusit.
Në SHBA, punonjësit shëndetësorë kapin shifrën prej rreth 21 milion dhe janë njerëzit më të ekspozuar ndaj koronavirusit. Banorët e institucioneve të kujdesit afatgjatë janë rreth 3 milion.
Shumica e njësive juridike shtetërore dhe lokale shpresojnë të jenë në gjendje t’i vaksinojnë punonjësit e tyre të kujdesit shëndetësor brenda tre javësh nga marrja e dozës së parë të një vaksine për COVID-19n, tha një zyrtare e Qendrave Amerikane për Kontrollin dhe Parandalimin e Sëmundjeve gjatë një takimi të komisionit këshillues të martën.
Nancy Messonnier, drejtore e Qendrave Kombëtare të CDC për Imunizimin dhe Sëmundjet e Frymëmarrjes, foli gjatë një takimi të Komitetit ku u diskutua se cilat grupe duhet të marrin të parat vaksinat pasi ato të vihen në dispozicion, ndoshta në dhjetor.
FDA-ja po shqyrton një kërkesë të kompanisë Pfizer për dhënien e autorizimit për përdorimin e vaksinës së saj kundër COVID-19. Kompania tjetër amerikane Moderna njoftoi të hënën se ka aplikuar gjithashtu për të marrë një autorizim për përdorimin e vaksinës së saj.
CDC-ja kishte rekomanduar më parë që punonjësit e shëndetësisë, që punojnë në vijën e parë të frontit dhe personeli i tyre ndihmës të marrin dozat e para të vaksinave. CDC-ja gjithashtu tha se banorët e shtëpive të të moshuarve dhe institucioneve të tjera të kujdesit afatgjatë duhet të jenë ndër të parët që të vaksinohen.
Disa orë pas njoftimit të kompanisë Moderna, Sekretari i Shëndetësisë dhe Shërbimeve Njerëzore Alex Azar tha se agjencia do të njoftojë vendimin rreth një javë pas vendimit lidhur me aplikimin e Pfizer-it.
Dr. Larry Corey i universitetit të Uashingtonit, i cili udhëheq provat klinike mbi vaksinat në SHBA, ka thënë se pasi të miratohen vaksinat e kompanive Pfizer e Moderna, ato mund të prodhojnë 50 milionë doza në janar.
Komisionit këshillimor mblidhet një ditë pasi në SHBA u raportuan rreth 139 mijë raste të reja me koronavirus dhe 826 vdekje, sipas Universitetit Johns Hopkins.
Prej muajsh SHBA vazhdon të kryesojë në botë për nga numri i infektimeve me koronavirus, me më shumë se 13.5 milionë raste nga totali prej 63.3 milionë rastesh në të gjithë botën. Që nga fillimi i pandemisë në SHBA kanë vdekur mbi 268 mijë njerëz si pasojë e COVID-19-s, të dhëna këto të universitetit Johns Hopkins, që raporton 1.47 milionë vdekje në të gjithë botën. /VoA
