Serbët lokalë në komunat veriore të Kosovës janë të pakënaqur me politikën e Listës Serbe dhe presidentit të serbisë, Aleksandar Vuçiq, karshi Kosovës. Lidhur me këtë ata kanë paralajmëruar se do të mbajnë protestë në Mitrovicën e Veriut të hënën me 9 janar.
Organizatori i protestës, Ivan Miletiq, ka thënë për Danas se serbët nga Kosova kanë mbetur “peng”.
Ai thotë se qytetarët me heqjen e barrikadave e panë se në cilin drejtim po shkon situata dhe se janë pajtuar që nuk do të pranojnë “as lojërat e Kurtit dhe as të Vuçiqit”.
Miletiq thekson se nuk u janë bashkuar organizatat formale dhe se nuk e dinë se sa njerëz do të vijnë duke pasur parasysh, siç thotë ai, frikën që ekziston tek qytetarët.
Sipas tij, qytetarët edhe pse paraprakisht dyshonin në “qëllimet e sinqerta të Vuçiqit dhe të një pjese të Listës Serbe”, për herë të parë besuan se do të kishte “rezistencë të përbashkët”.
“Më herët kemi tentuar të organizojmë disa protesta për të mirën e qytetarëve, por nuk ka pasur sukses sepse njerëzit janë udhëzuar në momentin e fundit që të mos vijnë sepse protestat nuk kanë mbështetjen e pushtetit. Por shpresojmë që populli të çlirohet pas kësaj situate të fundit në të cilën të gjithë kemi qenë qytetarë të manipuluar”, thotë Miletiq.
Protesta është caktuar për në ora 12:01 te monumenti i Car Llazarit në qendër të pjesës veriore të Mitrovicës.
