Sindikata e Bashkuar e Arsimit ka reaguar pas njoftimit të Qeverisë për 100 euro mbështetje, duke thënë se kjo krijoi një lloj entuziazmi dhe sindikatat menduan se Qeveria ka ndryshuar ‘qëndrimin e gabuar ndaj sindikatave dhe kërkesave të tyre legjitime’, por pjesa e dytë e deklaratës së kryeministrit Albin Kurti ‘tregoi se ai bashkë me Ministrin Murati këtë veprim e kanë bërë pse u është tekur ashtu dhe se mbështetja me 100 euro vlen vetëm për një muaj’.
“SBASHK-u i thotë Kryeministër t’u rritë ndera, por kërkesat e SBASHK-ut dhe sindikatave tjera mbesin të parealizuara sepse nuk ka dialog fare e as takime përmbajtjesore me sindikatat për të gjetur zgjidhje të përbashkët e të pranueshme për kërkesat e tyre që me 100 euro mbështetje të vazhdohet për gjithë të punësuarit në arsim, që nga çerdhet e deri në universitete dhe për shumë institucione të kulturës edhe në tërë sektorin publik deri të nis së implementuari Ligji i pagave”, thuhet në komunikatë.
“Pas 20 prillit do të fillohet me veprime sindikale në tërë sektorin e arsimit sepse kështu kanë vendosur, jo një individë, por delegatët e Kongresit të SBASHK-ut, që janë përfaqësues dhe zë i gjithë të punësuarve në sektorin e arsimit, që nga çerdhet, Arsimi Parauniversitar, Universitete dhe në shumë institucione të kulturës”, është shprehur tutje Zyra për informim e SBASHK-ut.
