Në përvjetorin e Lidhjes së Prizrenit, kryetarët e komunave shqiptare vlerësuan se nevojitet krijimi i më shumë urave te bashkëpunimit në mes të vendeve. Ata u bënë bashkë në qytetin e Prizrenit, në shënimin e 144-vjetorit të Lidhjes Shqiptare, takim i cili sipas tyre duhet të shërbejë për lidhje të reja në mes të shqiptarëve.
Kryetari i Komunës së Prizrenit, Shaqir Totaj
tha se takimi i sotëm i kryetarëve te komunave shqiptare duhet të shërbejë për
intensifikim të marrëdhënieve në mes te komunave shqiptare me qëllim të
përmirësimit të mirëqenies se qytetarëve.
“Pa Lidhjen e Prizrenit nuk do të kishim 28
nëntorin e vitit 1912, nuk do të kishim lëvizjen kombëtare për çlirimin e
Kosovës e cila arriti kulminacionin historik me Ushtrinë Çlirimtare të Kosovës,
pa Lidhjen nuk do të kishim çlirimin dhe shpalljen e pavarësisë së shkurtit të
vitit 2008. Pa Lidhjen e Prizrenit rrjedha e historisë sonë kombëtare nuk do të
ishte e njëjtë… Takimi i sotëm është hap i rëndësishëm drejt intensifikimit të
marrëdhënieve në mes te shteteve tona, shkëmbimi i përvojave nga zonat ku
jetojmë është mundësi e artë për të reflektuar për ndryshimet qe na plotësojnë
e na bashkojnë e na pasqyrojnë historinë e veçantë. Ky takim sot të shërbejë në
funksion të ndërtimit të urave të bashkëpunimit”, ka thënë Totaj.
Kryetari i Tiranës, Erion Veliaj tha se
synojnë rritjen e bashkëpunimit në mes të shqiptarëve dhe mes komunave që
përfaqësojnë duke bërë punë të mira për qytetarët.
“Besoj fort që ky takim i sotëm e ka edhe ai
përmasën e vet historike, dua ta quaj një Lidhje moderne të Prizrenit, një
lidhje të re që na bënë bashkë si dikur paraardhësit tanë nga të gjitha trevat
shqiptare. Sigurisht koha është tjetër, situata është krejt tjetër nga ajo e
144 viteve më parë, ne nuk jemi në luftë, jemi në paqe, ne nuk kemi rreziqe
territoriale, synimi ynë nuk është vendosja e kufijve, përkundrazi shkrirja e
kufijve dhe rritja e bashkëpunimit në mes vete, nuk ka konflikte dhe jemi të
gjithë në një emërues të përbashkët për nevojën dhe domosdoshmërinë e
komunikimit dhe dialogut në mes nesh. Ne duam dhe duhet të japim e të marrim
nga njëri-tjetri. Duhet të bëhemi bashkë por jo thjesht për të qëndruar bashkë
por për të bërë diçka, punë të mira së bashku”, ka kryetari i Tiranës.
Ndërsa kryetari i Komunës së Prishtinës,
Përparim Rama pati disa kërkesa për Shqipërinë, që të ndihmojë Kosovën në
rrugën e saj euroatlantike.
“Si kryetar i kryeqytetit të Kosovës po bëj
thirrjen time publike që Shqipëria të përdorë zërin e saj për të folur me gojën
mbarë shqiptare këtë muaj që shqiptarët kryesojnë në OKB. Dhe në këtë është
lajm i mrekullueshëm fakti se në agjendën e Këshillit të Sigurimit do të hapet
këto dite çështja e përjashtimit në masë të shqiptarëve nga listat e votimit në
Luginën e Preshevës të cilën Komiteti i Helsinkit e ka quajtur spastrim etnik administrativ.
I bashkohem po ashtu si shërbyes civil edhe si zëdhënës i kryeqytetasve të
Kosovës dhe kërkesës tjetër që shteti i Shqipërisë, si pjesa e kombit që tashmë
është vend anëtar i NATO-s, të ushtrojë ndikimin për përshpejtimin e
anëtarësimit edhe të Kosovës më Aleancën e Atlantikut Verior. Por nuk dua të
mbetem vetëm të kërkesat, askush nuk na pengon fjala vjen që t’i shtojmë dhe
forcojmë lidhjet tona më shumë e shumë fusha”, ka thënë Rama.
Por kryetari i Preshevës, Shqipërim Arifi
kërkoi interesim më të madh nga Qeveria e Shqipërisë dhe ajo e Kosovës për
shqiptarët e Luginës.
“Pra Lidhja e Prizrenit e para 144 viteve nuk
ka përfunduar dot, është ende ideja në zhvillim, nëse dikush ndjehet rehat prej
shqiptarisë, që fatkeqësisht unë po e shoh që disa po ndjehen rahat është
gabim, është gabim, ne duhet shumë më proaktiv me qenë, nuk duhet me pa vetëm
Preshevën si një jetim, nuk duhet me pa Preshevën vetëm si ‘limomi i thartë’ po
mundohet me e prishë dasmën e madhe. Presheva është pjesë e kombësisë shqiptare,
e shqiptarët e Luginës së Preshevës e presin Tiranën, Prishtinën, Tetovën, e
presin Prizrenin, e pret edhe Qeverinë e Kosovës dhe Qeverinë e Shqipërisë për
të qenë shumë më prezent sesa janë, fatkeqësisht shumë më prezentë. Në ketë
kontekst unë këtu sot dua të apeloj pikë së pari të kolegët e mi, ne jemi
kryetar komune mundemi të punojmë shumë më shumë së bashku”, ka thënë ai.
Kryetari i Komunës së Tetovës, Bilall Kasami
tha se po angazhohen për ndërtimin e rrugës Tetovë-Prizren qe sipas tij do te
ishte një lidhje e re për bashkimin e shqiptarëve.
“Më lejoni sot në frymën e kësaj ngjarje te
theksoj dëshirën dhe angazhimin për të nxitur fuqishëm përkushtimin tonë të
përbashkët për të ndërtuar rrugën Tetovë-Prizren, një rrugë që do te lidhë dy
qytetet tona dhe do të fuqizonte këmbimin në mes te dy qyteteve por edhe frymën
e vëllazërisë në mes nesh në frymën e vlerave evropiane. Lidhja e dy qyteteve
tona do të ishte një lidhje tjetër që do të na bashkonte në angazhimin e
përbashkët për te qenë më afër njëri-tjetrit në kohën kur kufijtë po bëhen
gjithnjë e më të parëndësishëm, në kohën kur bashkëpunimi vlerësohet si themel
i perspektives evropiane”, tha kryetari i Tetovës.
Kryetaret e komunave shqiptare u mblodhën më Prizren për te shënuar 144 vjetorin e Lidhjes Shqiptare të Prizrenit. Kjo ngjarje konsiderohet si kthesa më e rëndësishme e kombit shqiptar për bashkimin e tyre./KP/
