Në nëntë muajt e këtij viti ankesat e konsumatorët janë dyfishuar, krahasuar me vitin e kaluar.
Numër i madh i qytetarëve janë ankuar se i përket produkteve me afat të skaduar e ngritjes së çmimeve, kështu thotë Fatbardha Restelica nga Instituti për Politika Zhvillimore.
Ajo ka bërë të ditur se vitin 2020 kanë pranuar mbi 600 mesazhe direkte nga qytetarët që u ankuan për parregullsi të natyrave të ndryshme.
“Vetëm gjatë vitit 2020 i kemi pasur diku rreth 500 mesazhe direkte, ndërsa nëse flasim nga janari e deri tash në shtator të 2021 kemi pasur më shumë se 600 mesazhe të konsumatorëve të cilët po ankohen për parregullsi. Pra numri përpos që është dyfishuar për periudhën e ngjashme të këtij viti po presim që të arrijë edhe 1 mijë deri në fund të këtij viti”, tha Restelica.
“Me pandeminë edhe konkurrenca është rritur, ku bizneset kanë bërë një luftë të ashpër në mes vete për përfitime materiale sepse kanë pasur humbje të mëdha gjatë mbylljeve, dhe kjo ka ndikuar që ankesat të shumëfishohen. Kryesisht ankesat kanë qenë për çmimet e njëtrajtshme në gjitha marketet ku konsumatorët nuk kanë pasur mundësi ku të zgjedhin se cili produkt është më i lirë, pastaj kanë pasur ankesa me afat të skaduar dhe raste të shumta”, shtoi ajo.
Kurse qytetarët shprehen të dëshpëruar, pasi thonë se u shkelen të drejtat. Fatmir Makolli tha se nëpër raftet e marketeve ka hasur në shumë artikuj me afat të skaduar.
“Hiç, zero nuk respektohen. Në market të thjesht me hy nuk i shikojnë artikujt ku krejt janë më afat të skaduar e ka shumë sëmundje nga to, pastaj kur është puna 1 cent nuk kanë me ta kthye, ka 1 cent sa populli i le aty e sa njerëz blejnë. Po ashtu çmimet më të shtrenjta janë këtu”, u shpreh ai.
Edhe Gani Musliu theksoi se janë të diskriminuar si konsumatorë, dhe sidomos gjatë pandemisë kanë vërejtur se çmimet janë ngritur shumë lart.
“Mund të them që pak, e në shumë raste edhe jemi të diskriminuar sidomos pas pandemisë çmimet kanë ndryshuar në mënyrë të lartë, duke cekur këtu edhe çmimin e vajit i cili është më i lartë se shtetet e regjionit. Edhe afatet e skadencës i ndryshojnë brenda natës kur merr ushqimin e sheh se është i prishur”.
Lutfi Berisha po ashtu tha për EO se konsumatorët duhet të ankohen më shumë, sepse shpesh varet edhe nga standardi i jetesës së qytetarëve.
“Sa i përket konsumimit të materialit jetësor për mendimin tim është standarde, por me çmime diku të rritura, edhe konsumatori nuk po ankohet mjaftueshëm, varet edhe nga standardi i jetesës së secilit qytetar”, theksoi Berisha.
