Në mbështetje të ligjit për vetëqeverisjen lokale, statutit të komunës dhe në bazë të planit të reagimit kombëtar, kryetari i Komunës së Malishevës, Ragip Begaj, ka urdhëruar mbylljen e të gjitha bizneseve.
Përjashtim nga ky vendim bëjnë: barnatoret, barnatoret bujqësore, marketet ushqimore, mullinjtë, furrat e bukës, posta dhe telekomi, njësia e Hidroregjionit, e Ekoregjionit dhe KEDS-it.
Vendimi i të parit të Malishevës bëhet me qëllim të parandalimit të përhapjes së COVID-19 dhe mbrojtjes së shëndetit të popullatës.
Begaj iu bën thirrje të gjithë qytetarëve, që të zbatojnë këshillat e Institutit Kombëtar të Shëndetësisë Publike, për mbajtje të distancës, mbajtje të higjienës, qëndrimit në shtëpi dhe të mos daljes pa nevojë.
Ai porosit qytetarët, që edhe nëse kanë nevojë të dalin për blerje, këtë ta bëjë vetëm një anëtar i familjes, e jo më shumë, në mënyrë që të mos krijohet tollovi në markete, pasi kjo shkakton rrezik për të gjithë.
“Po ashtu, sot janë duke u aplikuar edhe masa tjerë shtesë, ku obligohem për dezinfektim të shtuar në markete dhe objekte tjera, si zbatim të përpiktë të të gjitha urdhëresave, përndryshe të gjithë do të përballen me masat e parashikuara. Për zbatimin e kësaj urdhërese është obliguar Drejtoria e Inspektoratit dhe Policia e Kosovës “
