Aksidenti me përfundim tragjik që ndodhi të hënën tek Ministria e Arsimit në Prishtinë nuk ishte i vetmi.
Një ditë më parë ndodhën plot 70 aksidente, të cilët përfunduan me lëndime pjesëmarrësve në komunikacion. E, ndonëse jemi në muajin e dytë të vitit, deri tani jetën në trafik e kanë humbur tetë persona.
Mirëpo, Jeton Rexhepi që udhëheq Divizionin për Komunikacionin Rrugor në Policinë e Kosovës, thotë se situata me aksidentet është më e mirë sesa vitin e kaluar.
“Vitin e kaluar deri në këtë periudhe të vitit kanë qenë 16 ndërsa tani janë 8. Por është edhe numri i aksidenteve ne lëndime shënon rënie. Është në rritje numri me aksidente me dëme të vogla material që ka rrite edhe numrin e aksidenteve në përgjegjësi”, ka thënë Rexhepi.
Rexhepi tregon se që nga 22 shkurti, Policia ka urdhëruar që të krijohet siguri më e madhe edhe për këmbësorët, si dhe kanë nisur një fushatë për vetëdijesimin e tyre.
Në ndërkohë, njohësi i çështjeve të sigurisë, Hajrullah Tërnava po thotë se pos këtyre, Policia e Kosovës duhet të ashpërsojë dënimet për thyesit e rregullave në trafik.
“Nëse vazhdohet kështu a mund të folim për një shtet legal që ekziston dhe jetëson ligjet e veta pra në bazë të kësaj duhet MPB si institucion t’i ashpërsoj ligjet e veta dhe t’i angazhoj policinë që ata të ndërmarrin preventive”, ka thënë
Dje në Prishtinë mbeti i vdekur një 26-vjeçar, pasi që një veturë e ka goditur semaforin, i cili më pasi e goditi qytetarin, i cili ndërroi jetë në vendin e ngjarjes.
