Gjashtë persona janë konfirmuar të prekur me COVID-19 nga komuna e Pejës, ku një prej tyre është në gjendje më të rëndë dhe është duke u trajtuar në Klinikën Infektive në Prishtinë, ndërsa 5 raste të tjera janë duke u trajtuar në shtëpitë e tyre dhe gjendja shëndetësore e tyre është stabile.
Drejtori i Shëndetësisë dhe Mirëqenies Sociale në Komunën e Pejës, Petrit Loci, thotë se si komunë i kanë ndërmarrë të gjitha masat e nevojshme për parandalimin e përhapjes së coronavirusit.
Loci për KosovaPress, ka bërë të ditur se gjendja e një pacienteje që gjendet në Klinikën Infektive është e rëndë, ndërsa 5 personat e tjerë të prekur nga ky virus janë duke u trajtuar nëpër shtëpitë e tyre.
“Që nga fillimi i pandemisë janë 6 raste të konstatuara, ku një prej tyre, rasti i parë është i shtrirë në Klinikën Infektive në QKUK, ndërsa 5 raste të tjera janë duke u trajtuar në vendbanimet e tyre, pra në izolim shtëpiak. Gjendja shëndetësore nuk ka qenë e mirë për shkak të moshës së pacientes dhe sëmundjeve kronike të tjera të cilat i ka. Ndërsa gjendja shëndetësore e 5 personave të tjerë është stabile”, tha ai.
Loci bëri të ditur se kanë bërë gjurmimin e të gjithë personave që kanë pasur kontakt me personat e prekur me virusin COVID-19.
“Po, janë protokollet të cilat i përdorim tek personat të cilët janë konstatuar dhe janë kontaktet të cilat i monitorojmë, pra kontaktet e para, të dyta dhe të treta. Si dhe i përcjellim të gjitha rastet të cilave iu ka caktuar masa e izolimit shtëpiak”, tha Loci. /Telegrafi/
