Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj ka njoftuar se të shtunën nuk do të mbahet mësim.
“Lidhur me kompensimin e humbur, duhet të theksoi se ishte vendim i ngutshëm i ministres Nagavci, e cila nuk respektoi kontratën kolektive të arsimit që është nënshkruar nga MAShTI dhe SBAShK-u më 22 janar 2021 dhe nen 21 pika 8 e thotë qartazi se orët e humbura gjatë grevës nuk zëvendësohen përveç nëse palët nënshkruese arrijnë marrëveshje të veçantë. ministrja Nagavci në vend të konsultimeve me SABShK-un dhe palët e tjera solli vendim të njëanshëm prandaj SBAShK-u është i obliguar ta respektojë kontratën kolektive, nenin 34 pikën 8 dhe e themi publikisht se këtë të shtunë nuk do të ketë mësim në emër të kompensimit të orëve të humbura në grevë”, ka thënë Jasharaj në konferencën për medie.
Ai tha se pret që gjatë javës së ardhshme të mbajnë një takim me Nagavcin për ta debatuar këtë çështje.
“Presim që gjatë javës së ardhshme ministrja të na ftojë në takim SBAShK-un por edhe përfaqësuesit e asociacionit të komunave dhe përfaqësues të DKA-ve, të Këshillit të Prindërve dhe ta debatojmë këtë çështje, deri atëherë mbetet ajo që thuhet në kontratën kolektive”, ka thënë Jasharaj.
