Ministria e Ekonomisë dhe Ambientit (MEA) dhe JICA japoneze kanë nënshkruar Marrëveshjen për realizimin e Projektit për bashkëpunim teknik me 4 komuna, kjo me qëllim të përmirësimit në menaxhimin e mbeturinave.
Marrëveshja, e cila kap shumën prej 2.8 milionë euro është nënshkruar nga sekretari i Ministrisë së Ekonomisë dhe Ambientit, Fatos Qerimi dhe zëvendëspërfaqësuesi i JICA-s për Ballkan, Hibio Takashi. I pranishëm në këtë ceremoni ishte edhe ministri në detyrë i MEA-së, Muharrem Nitaj, i cili tha se Japonia është në radhën në shteteve që janë miq strategjik të Kosovës, teksa dha detaje për marrëveshjen e nënshkruar sot.
“Është një projekt që do të ndihmojë në trajtimin e mbetjeve dhe mbeturinave në katër komuna të rajonit të Prizrenit, në Dragash, Suharekë, Rahovec dhe Malishevë, i cili do të fillojë në maj të këtij viti dhe do të zgjasë për 3 vjet”, tha Nitaj.
Ai tha se qeveria japoneze ka ndihmuar vazhdimisht Kosovën, që nga paslufta e këtej. I ngarkuari me punë në Ambasadën e Japonisë në Kosovë, Mitsunori Ogasawara u shpreh se janë pajtuar të vazhdojnë bashkëpunimin edhe më tej.
“Jemi pajtuar të vazhdojmë bashkëpunimin. Kjo marrëveshje ka të bëjë me ndihmë teknike, ku nëntorin e kaluar kemi dhuruar 15 kamionë për mbledhjen e mbeturinave për regjionin e Prizrenit. Shpresoj që ekspertët japonezë të vizitojnë së shpejti Kosovën dhe të bashkëpunojnë me popullin e Kosovës”, u shpreh ai.
