Federata e Futbollit e Kosovës (FFK) ka reaguar ndaj lajmeve të fundit që lidhen me Kongresin e 49-të të UEFA-s, duke konfirmuar se Kosova mori pjesë në këtë ngjarje me të gjitha simbolet shtetërore, me dinjitet dhe në përputhje të plotë me statusin e saj si anëtare e barabartë në UEFA dhe FIFA.
Paraqitja e Kosovës në Kongresin e UEFA-s, i cili u mbajt sot (e enjte) në Beograd, shkaktoi një bujë të madhe për shkak të përdorimit të simboleve shtetërore. Kryetari i FFK-së, Agim Ademi, u pa gjatë mbrëmjes së djeshme (e mërkurë) duke pozuar me flamurin e Kosovës në sallën “Sava Center”.
Më vonë gjatë mbrëmjes, disa huliganë serbë u panë jashtë sallës duke djegur flamurin e Kosovës, ndërsa Federata Serbe e Futbollit raportoi se prania e simboleve të Kosovës ishte një “lëshim” dhe ato u hoqën.
Megjithatë, FFK ka mohuar këto pretendime dhe ka theksuar se Kosova, si çdo federatë tjetër anëtare, u prezantua me simbolet e saj shtetërore dhe me dinjitet.
FFK gjithashtu i cilësoi si të pabaza deklaratat e Federatës së Futbollit të Serbisë, duke falënderuar UEFA-n për trajtimin e mirë dhe mbështetjen e vazhdueshme për zhvillimin e futbollit në Kosovë.
