Janë bërë më shumë se një muaj që nga vdekja e trishtë e 43-vjeçarit nga Peja, Visar Muriqi.
I ndjeri, më 11 tetor të këtij viti ishte kontaktuar nga një bashkëvendës që në një pompë derivatesh, të bënte shndërrimin e bombolës së gazit në mënyrë që e njëjta të përdorej për derivate të tjera.
Pa e ditur se ajo do të jetë dita e fundit e jetës së tij, Visari e pranoi këtu punë për hiç më shumë se 30 euro.
Shpërthimi i cisternës ishte fatal për të. IndeksOnline ka vizituar familjen e të ndjerit, për të mësuar më shumë rreth këtij rasti.
Prindërit e Visarit nuk i ndalin lotët për as edhe një moment, derisa rrëfejnë se si mësuan për vdekjen e të birit.
Tryezën e mëngjesit atë ditë e shtruan pa të, kafshatë kjo që u mbeti në fytë me të marrë lajmin për vdekjen e të birit.
“Po atë ditë ishte e premte data 11, djali ka shku si gjithë me punu si gjithë te këta kojshitë. Unë nuk e kam ditë që ka me shku atje, ata ishin shku me kry një punë i kish pa thirrë ai, kish pas një cisternë me pre. Ai e ka pytë a është rrezik a nuk është…ai ka thënë jo nuk është se janë ventillat krejt çelun janë qe sa vjet. Ata kanë fillu me pre, aty t’u e pre veç ka eksplodu dhe ja ka marrë jetën djalit”, thotë babai i Visarit, Shaqir Muriqi.
Mes tjerash, Shaqiri rrëfen mes lotësh për momentin kur mësuan për vdekjen e të birit.
“Erdh ky kojshia me atë vëllanë e kish pa ndi atje në Pejë, na kem t’u honger bukë … e qeshtu! Lëndim më të randë s’ka ”, thotë Shaqiri.
“E kemi përcjell djalin shnosh si molla e na ka ardh copa- copa në sanak, a është e vështirë për familjen … shumë është e vështirë, tepër”, thotë nëna e të ndjerit, derisa kërkon që fajtorët të marrin dënimin e merituar.
Lidhur me këtë rast, Gjykata Themelore në Pejë po vazhdon hetimet ndaj pronarit të pompës “Delta Group”, Vesel Jusajt.
