Prokuroria Themelore në Prishtinë ka ngritur aktakuzë ndaj 31 personave për keqpërdorim të pozitës zyrtare dhe për dallavere me patentë shoferë. Po ashtu, është kërkuar anulimi i testit për patentë shofer për 45 kandidatë.
Në njoftimin e Prokurorisë bëhet e ditur se për këtë rast janë kryer hetime tash e dy vite.
“Prokuroria Themelore në Prishtinë, njofton opinionin publik se Departamenti i Krimeve të Rënda, konkretisht Njësiti për Krime Ekonomike dhe Korrupsion, sot më 31.03.2021, pas një pune të gjatë hetimore, në kohëzgjatje rreth dy vitesh, ka ngritur aktakuzë ndaj tridhjetenjë (31) personave, me inicialet: N.LL., F.A., F.E., F.F., A.B., L.Sh., A.R., F.L., Sh.Z., E.B., D.ZH., N.B., A.M., L.A., M.M., A.T., P.T., B.J., S.RR., F.F., B.P., N.Th., S.B., E.L., D.I., E.F., M.R., H.H., M.D., L.H. dhe B.J., për shkak se në këtë rast është gjetur se ekziston dyshimi i bazuar mirë se të njëjtit kanë kryer veprat penale “Keqpërdorimi i pozitës apo autoritetit zyrtar “, nga neni 414 paragrafi 1 të KPRK-së lidhur me nenin 31 dhe 77 të KPRK-së, “Pranimi i rryshfetit në sektorin privat”, nga neni 309 paragrafi 1 lidhur me nenin 31 të KPRK-së, “Moslajmërimi i veprave penale apo kryesve të tyre”, nga neni 378 paragrafi 1 të KPRK-së, “Rastet e posaçme të falsifikimit të dokumenteve “, nga neni 391 paragrafi 1 pika 1.3 lidhur me nenin 31 të KPRK-së, “Zbulimi i fshehtësisë zyrtare “, nga neni 426 paragrafi 1 lidhur me nenin 31 të KPRK-së, “Dhënia e ryshfetit “, nga neni 422 paragrafi 1 të KPRK-së, “Dhënia e ndihmës në kryerjen e veprës penale të pranimit së ryshfetit në sektorin privat”, nga neni 309 paragrafi 1 lidhur me nenin 30 të KPRK-së dhe “Dhënja e rryshfetit në sektorin privat”, nga neni 310 paragrafi 1 të Kodit Penal të Republikës së Kosovës”, bëhet e ditur në njoftim.
Po ashtu, Prokuroria ka bërë të ditur se lidhur me këtë rast, në Gjykatën Themelore në Prishtinë është deponuar edhe urdhri për shpalljen e shtatë dëshmitarëve bashkëpunues dhe një marrëveshje për pranimin e fajësisë.
“Po ashtu në këtë aktakuzë, prokurori i rastit ka kërkuar dënimin plotësues- ndalimin e ushtrimit të profesionit për njëzetenjë (21) zyrtarë publik të përfshirë në vepra penale nga kapitulli 23 të korrupsionit zyrtar dhe kundër detyrës zyrtare, si dhe është kërkuar anulimi i testit për patentë shofer për dyzetepesë (45) kandidatë”, bën të ditur njoftimi.
Të dyshuarit ishin arrestuar në korrikun e vitit 2019. Në mesin e tyre 16 ishin zyrtarë të Ministrisë së Infrastrukturës dhe Transportit, të cilët dyshohen të jenë të përfshirë në manipulime me patentë shoferë.
Nga të arrestuarit e tjerë janë një menaxher, 3 mjekë, një psikolog ordinance dhe 2 punonjës së një auto-shkolle në Fushë Kosovë
