Shifrat në ekonomi është çështja për të cilën më së shumti përplasen deputetja e LDK-së, Hykmete Bajrami dhe ministri i Financave, Hekuran Murati.
Në përplasjen e sotme u përfshi edhe koordinatorja e komiteteve të Vetëvendosjes, Dejona Mihali. Ajo tha se Bajrami nuk mund të japë sqarime “deri diku të besueshme” për çmimet e barnave dhe kontabilitetin e “bie fjala Riga Pharm”.
Mihali tha se për tjera çështje Bajramit “i ka ikur treni prej kohësh” – e madje e kritikoi edhe për drejtshkrim.
Asaj i reagoi vetë Bajrami, duke thënë se do të ushtrojë padi ndaj saj për shpifje.
Bajrami tha se nuk ka lidhje biznesi me Riga Pharm dhe shtoi se “kjo gënjeshtër” flitet qe tri vite por nuk është thënë publikisht.
“Tash po dihet adresa e saktë e shpifjeve dhe fushatave kundër meje. Dhe, jam e lumtur që nga nëntoka doli dhe tash e di adresen e shpifjeve, që bëhen që tri vite. Unë do të ushtroj padi ndaj zonjës Mihali për shpifje. E di që nuk e ka problem të shpifë zonja Mihali por le të vendosë gjykata mbi pretendimet e saj. Le t’i prezantojë faktet për çfarëdo që ka për mua prej fabrikave të armëve e deri te kompanitë farmaceutike. Nuk ju friksohem dhe nuk do të zbrapsëm, kot e keni. Nuk kam lidhje biznesi me Riga Farm, nuk kam pasë, nuk me lidhë asgjë me sektorin e farmacisë as me çmimet e produkteve farmaceutike, këto janë shpifje dhe vetëm shpjfje. Këtë gënjeshtër e flisni që 3 vite, por se keni thënë publikisht andaj edhe s’kisha mundësi të ju padisë më herët.”
Bajrami tha se fushatën linçuese “po del” që e ka udhëhequr Mihali.
Ajo e pyeti Mihalin se pse është ftuar nga Prokuroria Speciale për intervistim për KEK-un.
“Fushatën linçuese po del se e keni udhëhequr ju zonja Mihali. Prandaj edhe me juve kërkoj përballje. Tash në gjykatë. Meqë keni dështu në secilin sektor, ju ka mbetur vetëm të ricikloni shpifje. Prandaj, Ju zonjë tregoni se pse ju ftoi Prokuroria Speciale për korrupsionin në KEK. Pse?”
