Mefail Bajqinovci, deputet i Lëvizjes Vetëvendosje, ka bërë thirrje për pjesëmarrjen aktive të diasporës në zgjedhjet e përgjithshme të Kosovës që do të mbahen më 9 shkurt.
Ai ka theksuar rëndësinë e votës së mërgatës për forcimin e institucioneve demokratike dhe për të ndihmuar në avancimin e procesit të shtetndërtimit të Kosovës.
Pjesëmarrja e diasporës është e rëndësishme për të reflektuar interesat e të gjithë qytetarëve të Kosovës, pavarësisht vendndodhjes së tyre.
Tutje, deputeti i Lëvizjes Vetëvendosje, Mefail Bajqinovci, ka reaguar pas mbledhjes së përbashkët të Kuvendit të Kosovës dhe atij të Shqipërisë, duke kritikuar kryeministrin Edi Rama për sulmet ndaj Qeverisë së Kosovës. 
Në një postim në Facebook, Bajqinovci theksoi se këto mbledhje duhet të jenë platforma të unitetit dhe bashkëpunimit, jo arena për sulme politike apo promovime elektorale. 
Ai shtoi se në ceremoni të tilla, fokusi duhet të jetë tek temat që bashkojnë dhe fuqizojnë lidhjet mes dy vendeve, duke shprehur keqardhje për qasjen e Ramës gjatë mbledhjes. 
Kjo mbledhje e përbashkët e dy kuvendeve u mbajt më 20 dhjetor në Prishtinë, ku morën pjesë 130 deputetë nga të dyja vendet, si dhe kryeministrat Edi Rama dhe Albin Kurti. 
Pavarësisht synimeve për forcimin e bashkëpunimit, mbledhja u shoqërua me tensione pas kritikave të Ramës ndaj institucioneve të Kosovës, veçanërisht lidhur me çështjen e ish-krerëve të UÇK-së që po gjykohen në Hagë. 
