Niveli i qarkullimit të parasë nëpër biznese është rritur gjatë dhjetorit.
Kjo, sipas Odës Ekonomike të Kosovës, është si rezultat i ardhjes së diasporës dhe tërheqjes së mjeteve nga Trusti.
“Kjo ka krijuar një optimizëm të madh te bizneset e vendit për një përmbyllje sado pak pozitive të këtij viti jashtëzakonisht të vështirë, një përmbyllje që u siguron bizneseve mbijetesë”, ka thënë kryetari i OEK-ut, Berat Rukiqi.
Rukiqi, në një konferencë për media të shtunën, ka thënë se krahasuar me vitin 2019, këtë vit qarkullimi i parasë ka rënë për 1.2 miliard euro.
Sipas tij, krizat politike mund të ndikojnë në thellimin e krizës dhe shtyrjen e rimëkëmbjes ekonomike.
Për këtë, Rukiqi, ka kërkuar miratimin e buxhetit para mbajtjes së zgjedhjeve.
“Nëse nuk ndodh kjo, jo që nuk mund të flasim për rimëkëmbje por do të jetë skenari më i dëmshëm për vendin që nga paslufta përshkak se nuk ka asnjë hapësirë ligjore dhe instrument financiar që do të mund ta mbajë funksional vendin dhe ta mbajë ekonominë në lëvizjes”, ka deklaruar ai.
Rukiqi theksoi se Kosova ka shënuar rritje të eksportit këtë viti, rritje kjo që sipas tij, nuk ka qenë ndonjë herë. /
