Drejtuesit e futbollit të Arabisë Saudite po planifikojnë të nënshkruajnë me Cristiano Ronaldon dhe Lionel Messin për ekipet e ligës së tyre në vitin 2023.
Sipas gazetës Sport, Ronaldo ka marrë tashmë një propozim shumë milionësh nga Al Nasr dhe negociatat kanë avancuar, ndërsa futbolli saudit gjithashtu dëshiron të flasë me sulmuesin argjentinas pas Kupës së Botës, megjithëse tashmë ka pasur kontakte.
Largimi i papritur i Ronaldos nga Manchester United mund të ketë shumë të bëjë me ofertën tani në tavolinë. Nuk përjashtohet mundësia që ai të luajë gjashtë muaj te Newcastle, në formë huazimi pasi kanë pronarë sauditë, por synimi është që ai të shkojë te Al Nasr për të përfunduar karrierën. Flitet për shifra mbi 200 milionë euro neto për dy sezone
Kjo nuk është e gjitha. Arabia Saudite gjithashtu do të ndjekë yllin e Paris Saint-Germain, Messi, për të rritur ligën e tyre. Në fakt, ylli argjentinas tashmë ka nënshkruar një kontratë si ambasador i turizmit të Arabisë Saudite për shifrat astronomike.
Shifra nuk është zbuluar, por mund të jetë më shumë se 100 milionë dollarë për pesë vjet. Dhe atëherë ai do të kishte opsionin për të luajtur në vend me një pagë neto që është e paarritshme për klubet tjera në botë.
Presidenti i Federatës së Arabisë Saudite, Yasser Al-Misehal, e ka pranuar tashmë në gazetën argjentinase La Nacion se do të provojnë për Messin.
“Ne duam të flasim për këtë, për nënshkrimin për një ekip saudit, pas Kupës së Botës”, ka thënë Al-Misehal.
