Banka Qendrore e Kosovës ka njoftuar se është zvogëluar tarifa për depozitimin e monedhave metalike të denominuara nga 5,00% në 3,75%.
E gjitha kjo për lehtësim të qarkullimit të parave të gatshme në ekonomi.
“Në kuadër të angazhimit të vazhdueshëm për lehtësim të qarkullimit të parave të gatshme në ekonomi, Banka Qendrore e Republikës së Kosovës këtë fillim vit ka rishikuar tarifat që i aplikon ndaj bankave për transaksionet e ndërsjella monetare”, thuhet në njoftim.
“Rrjedhimisht, është zvogëluar tarifa për depozitimin e monedhave metalike të denominuara në euro në BQK nga 5,00% në 3,75%. Ky ndryshim do të jetë efektiv nga data 1 mars 2022”, potencon BQK.
Vendimi për zvogëlimin e tarifës për depozitimin e monedhave metalike të denominuara në euro është marrë në mbledhjen e Bordit Ekzekutiv të BQK-së.
BQK-ja tutje thekson se, pret që tarifa e ndryshuar të ndikojë në ngritjen e qasjes si të qytetarëve ashtu edhe të bizneseve në shërbimet e bankave vendore me para të gatshme.
Përndryshe, kostoja aktuale për BQK-në për realizimin e operacioneve të lidhura me aktivitetin bankar të depozitimit të monedhave metalike vazhdon të mbetet e konsiderueshme.
Sa i përket furnizimit me monedha metalike të denominuara në euro, BQK bënë të ditur se nga viti 2015, tarifa e aplikueshme për bankat vendore për tërheqje është 0,00% .
