Dy nxënës dhe shoferi i autobusit u vranë në Gllogjan të Deçanit me 26 nëntor. Dhjetë ditë pas kësaj ngjarje tragjike nuk ka asnjë të arrestuar.
Zbardhjen e rastit po e kërkojnë familjarët e Gani Gjokajt, shoferit të vrarë. Ata thonë se ende janë në pritje të ndonjë informacioni për rastin.
“Familja, brengën kryesore e ka zbulimin e rastit. Nga kush erdhi? Pyetja që çdo ditë bëjmë ne familjarët, vëllezërit, nëna e baba, pse dhe nga kush erdhi vrasja? Ta dimë arsyen. Nëse do t’i kishim pasur dikujt borxh ka pasur alternative tjera. Kjo për momentin është brenga më e madhe”, tha Fatmir Gjokaj.
Ai thotë se familja nuk është e kënaqur me institucionet shtetërore pasi sipas tij deri më tani së paku është dashur të ketë një pistë hetimi.
“Kemi hyrë në ditën e 11-të dhe nuk ka asnjë pistë hetimi. Nuk e kemi asnjë informatë të vetme që tregon se është duke u bërë një pistë hetimi apo që ka të dyshuar. Shpresojmë se një ditë e vërteta do të dalë në dritë”, deklaroi tutje Gjokaj për rtv Dukagjinin.
Kryeministri i Kosovës, Albin Kurti, ka deklaruar se sasia e informacioneve për vrasjen e trefishtë në Gllogjan të Deçanit është duke u shtuar.
Nga Prokuroria e Pejës kanë thënë se hetimet janë duke vazhduar dhe se në këtë moment nuk mund të japin informacione tjera.
Kujtojmë se Qeveria ka ofruar shpërblim në vlerë 20 mijë euro, për këdo që jep informacione që dërgojnë në arrestimin e autorëve të krimit.
