Nga Prof Hajdin Morina
Shprushi prushin e historisë
U mbush zjarr dhe u nis…
Plot Atdhe iu mbushën sytë
Kur hyri i pavdekshëm në Kosovë
Nëpër borë në atë dhjetor
Një nga një i merrte ngrykë
Katundet dhe qytetet e Shqipërisë
Që ishin shkoqur nga trungu
Pazareve të historisë
Seç e shkrinte borën
Seç e digjte kufirin
Në atë fund të motit
Në atë fund të mortit
Lartësive lartësohet përditë
Liri dhe Arbëri
Shkrep nga sytë
(1999)
MUJË KRASNIQI ËSHTË NJË
Në qendër të qytetit
Një Mujë e ka qyteti im
Vetëm një si Diellin
Vetëm një si Lirinë
I vetmi që nuk pushon
24 orë ballin përmbi re
Përditë e përqafojnë
Fëmijët nënat e dëshmorëve
Këngët dhe shqiponjat
Seç e zvogëlon përditë
Atdheun fytyrëzbehtë
Të partive politike
Kosovën e t’parëve seç e rrit
Lirinë dhe Shqipërinë
Me ato kroje Kruje
Që kurrë nuk shterin mbi Pashtrik
Vetëm një është ai
Si Dielli
Si Liria
Si Flamuri
Një Mujë e ka qyteti im
Vetëm një si Diellin
Vetëm një si Drinin
(2009)
PO VJEN MUJA
Këtu ishte gjithkund
Gjithkund këtu ai është
Por po vjen Muja
Mujë Krasniqi po vjen
Po vjen të na ngrejë
Ballin përpjetë
Shtatlartë mbështetur
Në qiell
Po vjen Muja sërish po vjen
Të na kaltërojë syrin
Të na gjelbërojë kujtimin
Po vjen të jetojë vertikalisht
Ta mbajë lart qiellin e tetë
Të Lirisë
Po vjen me fytyrën e moçme
Të Atdheut e të Flamurit tonë
Ai këtu ishte gjithkund
Gjithkund këtu ai është
Por po vjen sërish Muja
Mujë Krasniqi po vjen
(2009)
