Gjatë gjithë karrierës së tij futbollistike, Gennaro Gattuso, është njohur për një temperament të ashpër dhe agresiv, por reputacioni i fortë i futbollistit në fushë duket se nuk i ka stepur gangsterët italianë t’i vendosin një gjobë.
Ylli në pension i Milanit ndodhet në një përplasje me ‘Ndrangheta-n’, një nga organizatat mafioze që po dominon në Itali, kryesisht me qendër në Kalabri.
Kjo sindikatë, e njohur për shkatërrimin e shumë jetëve, tashmë i ka vënë sytë te familja e 46-vjeçarit Gattuso.
Gazeta italiane “Il Messaggero” raporton se kalvari i familjes nisi kur Francesco Gattuso, babai i Gennaros, vendosi të hynte në industrinë e fotovoltaikëve. Sipërmarrja e propozuar ishte menduar të ishte një biznes familjar, me motrën e Gattusos, Ida, e cila do të ishte bashkëpronare gjithashtu.
Gangsterët nuk humbën kohë dhe propozuan shërbimet e tyre “mbrojtëse” për biznesin e babait të Gattusos.
Ata kërkuan një tarifë prej 3,000 Euro.
Kur propozimi i mafiozëve u refuzua, makthi i familjes mori një kthesë për keq. Më 17 tetor, një person i panjohur i vendosi flakën makinës së Idës. Vetëm dy muaj më vonë, një tjetër nga makinat e saj u dogj.
“Kjo seri incidentesh të frikshme la të gjithë familjen të pushtuar nga frika, të shqetësuar për veprimet e mëtejshme të mafias”, shkruajnë mediat italiane.
Për të rritur sigurinë e tyre, Francesco Gattuso punësoi punonjës profesionistë sigurie, megjithëse kjo nuk arriti të zgjidhte situatën. Ida përfundimisht e çoi çështjen në polici. Gjatë procesit, u zbulua se Gennaro ishte detyruar gjithashtu të përfshihej. Ai pranoi kërkesat e mafias duke paguar 3,000 euro përmes një miku të tij më 10 janar.
Pas denoncimit policia arrestoi personin përgjegjës për djegien e makinave të Idës, si dhe personin që kishte orkestruar aktin. Megjithatë, ata janë vetëm dy operativë në një rrjet të gjerë kriminal që potencialisht mund të vazhdojë të dëmtojë familjen Gattuso, raporton euronews.al.
Aktualisht, Gennaro Gattuso drejton skuadrën franceze të Olympique Marseille, ku po mendon seriozisht zhvendosjen e familjes së tij në Francë
