Pejë – Driton Podrimçaku, është dënuar me 6 vite burg dhe 2 mijë euro gjobë për dy veprat penale “Fajde” dhe “Sulmi ndaj personit zyrtar”.
Shpalla e aktgjykimit ndaj tij u bë të hënën, në Gjykatën Themelore të Pejës, nga kryetarja e trupit gjykues Violeta Husaj Rugova, raporton “Betimi për Drejtësi”.
Sipas aktgjykimit, Podrimçaku, u dënua me 5 vite burgim dhe 2 mijë euro gjobë për veprën penale “Fajde”, kurse për veprën penale “Sulmi ndaj personit zyrtar”, i njëjti u dënua me 1 vit e 6 muaj, ndërsa u lira nga akuza “Shkaktim i rrezikut të përgjithshme”.
Kurse, pas shqiptimit të dënimit unik ndaj tij u shqiptua dënimi me 6 vite burgim dhe 2 mijë euro gjobë.
Po ashtu sipas aktgjykimit, i njëjti u urdhërua që t’ia kthejë shumen prej 50 mijë euro të dëmtuarit.
Ndryshe, më 28 shtator 2021, i pandehuri Driton Podrimçaku është deklaruar i pafajshëm se mori nga i dëmtuari Muhamet Berisha 60 mijë euro në emër të fajdes për veturën “BMW X5”, sulmoi zyrtarët policorë dhe ua rrezikoi jetën duke vozitur në mënyrë të pakontrolluar me veturë.
Ndryshe, aktakuza e ngritur nga Prokuroria Themelore në Pejë më 23 gusht 2021, ngarkon të pandehurin Podrimçaku se nga muaji janar i vitit 2019 e në vazhdimësi deri më 14 prill 2021, në Pejë, ka kontraktuar shumë joproporcionale të pasurisë ndaj të dëmtuarit Muhamet Berisha dhe duke shfrytëzuar gjendjen e rëndë financiare të dëmtuarit, kishte përfituar 60 mijë euro nga i dëmtuari.
Sipas aktakuzës për një veturë të tipit BMW-X5, në vlerë prej 17 mijë euro, i dëmtuari nga 2019 për dy vite, çdo muaj kishte paguar në emër të fajdesë shumën prej 2 mijë euro, kurse në vitin 2021, në emër të fajdesë, i dëmtuari kishte paguar edhe 12 mijë euro, gjithsej i pandehuri dyshohet se në emër të fajdesë kishte pranuar shumën prej 60 mijë euro.
Me këtë, dyshohet se ka kryer veprën penale të “Fajdesë”, nga neni 331, paragrafi 3, lidhur me par.1, dhe nenin 77 të Kodit Penal, për të cilën parashihet dënimi me gjobë dhe me burgim prej tre deri në 12 vite burgim.
I pandehuri akuzohej se më 13 prill 2021 në fshatin Vitomiricë në Pejë, ka sulmuar policin Shpejtim Tafili, derisa i njëjti kishte qenë duke i zbatuar masat e fshehta teknike të hetimit dhe vëzhdimit sipas urdhëresës së gjykatës.
Në aktakuzë thuhet se i pandehuri e godet me veturë të dëmtuarin derisa ky i fundit sinjalizon të ndalet.
Me këtë, ekziston dyshimi i bazuar mirë se ka kryer veprën penale “Sulmi ndaj personit zyrtar”, nga neni 402, par.4 lidhur me par.2 dhe par.1 të Kodit Penal, vepër e cila dënohet me burgim prej një deri në tetë vite.
Po ashtu, i pandehuri akuzohet edhe për shkaktim të rrezikut të përgjithshëm, pasi i pandehuri duke lëvizur me veturë në mënyrë të pakontrolluar, kishte vënë në rrezik jetën e të dëmtuarit Veton Osmani dhe zyrtarëve tjerë policorë.
Me këtë, ekziston dyshimi i bazuar mirë se ka kryer veprën penale “Shkaktim i rrezikut të përgjithshëm” nga neni 356, par.1, të Kodit Penal, vepër ku kryesi dënohet me burgim prej gjashtë muaj deri në pesë vjet. /
