Një person i mitur nga Skenderaj ka përfunduar dje në stacion policor, për shkak se u denoncua nga një bashkëmoshatare e tij, e cila deklaroi se u kërcënua me armë zjarri nga 17-vjeçari, raporton Gazeta Sinjali.
Burimet e Gazetës Sinjali brenda Prokurorisë kanë bërë me dije se i dyshuari dhe viktima janë nxënës të shkollës së mesme teknike dhe e gjithë ngjarja ka ndodhur derisa ata po udhëtonin me autobusin i cili i dërgon në fshatin Qirez.
Bazuar në dëshminë e të miturës, i dyshuari brenda autobusit ia ka ekspozuar armën duke i thënë ta shohë se çfarë ka me vete nën xhaketën që po mbante veshur.
E frikësuar nga e gjithë kjo, 17-vjeçarja ka denoncuar rastin në Polici, ku ka rrëfyer në detaje gjithë rastin.
Si rezultat i denoncimit, Policia në koordinim me Prokurorinë dhe me urdhër të Gjykatës kanë kryer bastisje në shtëpinë e të dyshuarit, ku kanë sekuestruar një armë lodër të plastikës.
Sipas të dyshuarit, kjo ka qenë arma me të cilën e ka kërcënuar viktimën, teksa Sinjali mëson se motivi i kësaj dyshohet të jetë për shkaqe xhelozie.
Pas intervistimit të të dyshuarit, Prokurori i Shtetit ka urdhëruar që ndaj tij të nisin hetimet nën dyshimet për kryerjen e veprës penale ‘Kanosje’.
/GazetaSinjali/
